TURA: West Garo Hills a·jani ning·o sorkarini kamko ka·enggipa je manderangan, NFSA 2013-ni PHH aro AAY card-rangko jakkalengachim, uandakgipa manderangni jakkalenggipa card-rangko a·jao cholgri ong·batgipa manderangna on·skana man·na gita card-rangko ra·pilchina, West Garo Hills a·jani Deputy Commissioner (Supply), nangchakegipa official-rangna ge·etaniko on·angaha.
Deputy Commissioner-ni parakatani gitade, Tura Municipal a·jani ning·o Socio Economic Caste Census (SECC) 2011-o watchanggalako man·e, NFSA 2013-oniba watchanggalako man·gipa nokdangrang bang·en donga aro iandake NFSA 2013-oni watchanggalako man·e cholgri ong·gipa nokdangrangna da·o gita COVID-19 giproroani somoio dakchakanirangko on·skana man·na gita, sorkario kam ka·gipa dongeba nokdango PHH, AYY card jakkalenggipa manderangko sandie report-ko on·skachina ua Tura Municipal area-ni ning·o donggipa dingtang dingtang development committee-ni president aro secretary-rangko didiataha.
DC-ni parakatani gitade, NFSA 2013-ni ning·o PHH aro AYY card-rangkoa songsalo cholgri ong·gipa nokdangrangnasa miksonge ra·gatahachim aro ia card-rangko sorkario kam ka·e professional tax aro uandakgipa gipin kajinarangko gamenggipa nokdangrangde man·ani ong·jachim.
2016 aro 2018 bilsirangoba apsan daken, sorkario kam ka·e AAY aro PHH card jakkalenggipa manderangko on·pilchina gita Deputy Commissioner (Supply) songbadrango u·iatahachim.
Indake ong·engon, Shillong-oni Food Civil Supplies & Consumer Affairs Director-ni ge·etaniko man·soahani gimin songsalo cholgri ong·gipa nokdangrangko aro ramarango songdonggiparangko, jabol kolamgiparangko, ramarango palbadinge cha·giparangko, gipin biaprangoni katnape kam ka·e cha·enggiparangko, nokgri jamgri ong·gipa manderangko aro uandakgipa manderangkoba NFSA 2013-ni ning·o dingtangmancha sandie bimingrangko segatchina gita, Tura Sadar Division-ni ning·o donggipa pilak Suppy-ni sub-inspector-rangna ge·etaniko on·ataha.