TURA: Tura Government College-o 2nd Semester-ni result-ko bilsiantian ja·manchake man·rongengani a·sel chatro chatrirang, chubata gadangrango poraidapangna cholrangko man·rongjaenga ine Garoland State Movement Committee (GSMC) aro NEHU Tura Campus-ni Post Graduate Students Union (PGSU) suk ong·gijaniko parakatenba, iani bidingo NEHU Tura campus-ni Pro Vice Chancellor Prof G Singaiah aro Tura Govt College-ni Principal Terrence D Marak-ko grongeaha.
GSMC aro PGSU-ni parakatani gitade, Meghalaya a·dokni gipin degree college-rangode 2nd Semester-ni result-ko somoi gita man·rongengoba Tura Govt College-ode 2020 aro 2021 bilsirangoba 2nd Semester-ni result-rangko ja·manchakesa man·tokenga aro uandaken chubata gadangrango poraidapangna nangenggipa chatro chatrirangde admission-rangko man·rikjae poraina cholrang ong·tokjaengahachim.
“Iani bidingo chinga NEHU Tura campus-ni Pro-Vice Chancellor Prof Singaiah-ko gronge agangrikon, ua iani bidingo NEHU-ni controller of examinations-na u·iate ia neng·nikaniko namatna ku·rachakataha,” ine GSMC-ni co-chairman Balkarin Ch Marak parakataha.
PGSU-ni president Jakrimra R Marak-ni parakatskaani gitade, iani bidingo uamang Tura Govt College-ni Principal-ko gronge agangrikon, uaba chatro chatrirangni namgnina iani bidingo NEHU Shillong campus-ona sedoatgen ine ku·rachakaniko on·ataha.
“Gipin college-rangode 2nd Semester-ni result-ko somoi gitan man·rongengoba Tura Govt College-ode result-ko ja·manchakesa man·rongengani a·selan chubata gadangrango poraidapangna nangenggipa chatro chatrirang cholrangko man·tokjaenga. Uni gimin poraienggipa chatro chatrirangni namgnina result-rangko somoi gita on·china chinga NEHU Tura aro Shillong campus-rangko didienga,” ine GSMC-ni sakgipin dilgipa Ryan Ch Marak parakataha.
Meghalaya a·doko lekka porani kamrangna gisiko nangjaengani a·selan Performance Grading Index (PGI)-o Meghalaya a·dok, India a·songo komibatsranggipa ong·aha ineba GSMC aro PGSU parakataha.
“Bida budian a·gilsakko dingtangatna gita bilakbatsranggipa silchidare ong·a ine an·ching agananiko knana man·a indiba Meghalaya a·dokode lekka porani kamrangna gisiko nanggijaniko an·ching pilakan nikenga. Uni gimin mikkangchi a·songko aro jatko dilnagipa chatro chatrirangni namgnina ia lekka porani kamrango gisik nangbatchina chinga sorkariko aro a·dokni Education Minister-ko didiatenga,” ine GSMC aro PGSU parakataha.
TGC-o 2nd Semester-ni result-ko ja·manchake man·engani a·sel neng·nikaniko man·tokenga
Date:
Share post:
