SHILLONG: Gittamgipa changna COVID-19 giprorotaina kenchaksoanirang ong·engon, ia sabisini giprorotaianiko champengsona gita North Eastern Indira Gandhi Institute of Health & Medical Sciences (NEIGRIHMS)-o tarisamsotokengaha.
U·i-ma·sigiparangni agansamsoani gitade, ia gittamgipa changna giproroanio bi·sarangan COVID-19-ko man·batnaba gnang.
NEIGRIHMS-ni Director P Bhattacharya-ni parakatani gitade, gittamgipa changna COVID-19 giprorotaigen ine ka·dongsoengani gimin ia hospital-o kam ka·enggipa doctor, nurse aro pilakkon skie on·engaha aro nangchongmotgipa bosturangkoba tarisamsoengaha.
“Ventilator gita dakgipa bosturangde manderangko jokatna man·jawa, uni gimin ia hospital-ni paediatric critical care-o doctor aro nurse-rangna skie on·soengaha. Obostarangni gimin ma·sigipa manderangkosa an·ching nangenga,” ine Dr Bhattacharya parakataha.
NEGRIHMS-o kam ka·giparangko rimdapna gita ma·mong sorkarioniko tangka paisarangko bi·dapataha ine janapatengon, ia hospital-o sak 50 nurse-rangko contractual basis-o rakkidapaha aro mikkangchi bang·bata doctor-rang, nurse-rang, counsellor-rang aro gipinrangkoba rimdapanggen ine NEIGRIHMS-ni Director parakataha.
Da·o dipet ia institute-o sak 250-na baten resident doctor-rang donga aro sak 50 nurse-rangko rimdapahani gimin kamrangko nambate ka·na man·enga ineba Dr Bhattacharya parakataha.
Palangrangni gimin janapatengon, skangde ia institute-o ge 25 COVID ICU palangrangsan dongaiachim indiba da·o ge 75 COVID ICU palangrangko donna miksongskaengaha ine Dr Bhattacharya parakataha.
Oxygen-rangko chu·onga gita jakkalna man·na gita ia institute-o oxygen plant-koba songdapanggen ineba NEIGRIHMS-ni Director parakataha.
Indake ong·engon, COVID-ko warachakna gita health department-ni dongimin niamrangko ja·rikjringchina gitaba ua manderangko didiataha.
