TURA: Adita salrangna skang, Haryana a·dokni hospital damsao doctor aro nurse-rangni simsakgijani a·sel A·chik me·chik saksani siangani ja·man uni adagipaba kragija obosta siangna nangaha ine A·chik Holistic Awakening Movement (AHAM) matnangatenba, iani bidingo ta·raken inquiry-ko dake dos donggipa manderangni kosako rakgipa ja·kurangko de·china a·songni Prime Minister Narendra Modi-na sedoataha.
AHAM-ni president Champion R Sangma-ni parakatani gitade, ia a·sel ong·ani re·anggipa June-ni 28 tariko Haryana a·dokni Gurgaon Hospital-o ong·ahachim. Ua somoio Nagaland a·dokni Rosy Sangma-ko saa dongani gimin uni adagipa Samuel Sangma, ALFA Hospital-ona rimangahachim indiba hospital-ni doctor aro nurse-rang simsakjahani a·sel Rosy Sangma siangna nangahachim. Iani ja·mano Rosy-ni adagipa Samuel Sangma, doctor-ni kosako sing·doaniko dakon, ukoba hospital-ni doctor kragija dake satkape aro ka·mikkenate watatahachim indiba iani ja·mano Samuel, kragija bewalo siangskana nangahachim.
Indake ong·engon, ia adasa sakgnini sianiara hospital-o kam ka·enggipa doctor aro nurse-rangni a·selan ong·aha ine AHAM-ni president matnangatenba, ia a·selni bidingo jakgitele am·sandichina aro dos donggipa manderangna rakbatgipa sastirangko on·china a·songni Prime Minister-ko didiataha.
“Chinga Meghalaya a·dokni A·chikrangba dukko man·enggipa nokdangna chakpaaniko aro kalimpaaniko on·enga,” ine Sangma parakataha.
India a·songni gipin bakrango iandake salgro salaramni manderangko onchepe roaniko mikkangchi jegalna aro jokatna gita salgro salaram a·dokrango songdongenggipa aro dingtang dingtang dilgiparangko ku·cholsan ong·e bakrimchina gitaba AHAM-ni president didiataha.