TURA: South Garo Hills a·jani bang·bata songrangon bijoliko name man·tokjaengani a·sel songni nokni manderang aro mongsongbate poraienggipa chatro chatrirang neng·nikanirangko man·tokna nangenga ine Awegre Development Committee (ADC) parakataha.
Iani bidingo ADC-ni dilgiparang, Meghalaya Power Distribution Corporation Limited (MePDCL)-na sedoatengon, Awegre, An·chigre, Pasimgre, Rongchanggre, An·chenggre aro Dana Adugre songrango bijoliko man·ani tik ong·srangjaenga ine parakatenba, ia songrangna bijoliko nambate on·china didiataha.
Awegre Development Committee-ni parakatani gitade, ia songrango bijoliko name man·jaengani a·sel chatro chatrirang aro dingtang dingtang kamrangko ka·na nanggiparangba neng·nikanirangko man·tokna nangengachim.
“Ia sal somoirango COVID-ni a·sel skulrangko chipe dontokna nangengon, internet gita class-rangko ra·skaengachim indiba ia songrangode bijoliko name man·rongjaengani a·selan bi·sarang class-rangko ra·pana man·jaenga,” ine Awegre Development Committee parakataha.
Ia songrango bijoli nosto ong·anirangko tarina aro nirok sandina gita lineman saksakosan donani a·selba kamrangko name nirokna aro ka·na man·jaenga ineba ADC parakataha aro ia songrangko nirokna gita lineman-rangko on·dapchina MePDCL-ni official-rangko didiataha.