SHILLONG: Meghalaya a·dokni sak 38 gital Meghalaya Civil Service (MCS) officer-rangko rimchaksona gita Bristibar salo dingtangmancha tom·aniko Shillong songjinmani Meghalaya Administrative Training Institute (MATI)-o ong·atangaha aro ia tom·anio a·dokni Chief Minister Conrad K Sangma, mongsonggipa sokgipa ong·e bakko ra·angaha.
Ia tom·anio a·dokni Chief Minister, jinmana aganprakangengon, a·dokni gital MCS officer-rangna didiani kattarangko aganangenba, miksongani gnang a·dokni namroro silroroanina kamko ka·china gita officer-rangko didiangaha.
“MCS officer ong·e kamko ka·na a·bachengengon, miksonganina gnangsa a·dokna dangdike on·na gita an·tangtangni daitorangko jako ra·china anga officer sakantikon didienga,” ine Chief Minister aganaha.
MCS officer-rangni dakna nanggni kamrangni gimin talataniko on·angengon, office somoirangosan kamrangko ka·aigija a·dokni namroro silroroanina aro a·doko dingtanganiko ra·bana miksongani gnang kamko ka·china Chief Minister didiangaha.
Kamtangtango pangnan gisik nanggiparang ong·china gita gital MCS officer-rangko didiangengon, a·dokna aro a·doko songdongenggipa manderangna dangdike on·na ka·oksiani dongchina gita Chief Minister aganangaha.
Dingtang dingtang neng·nikani aro ra·bianirang sokbaani somoirangoba an·tangtangni u·i-ma·sianirangko jakkale iandakgipa neng·nikanirangko chel·chakchina aro pangnan mandeskana bamao kamko ka·china gita Chief Minister didiangaha.
Ia tom·anio sak 38 gital MCS officer-rangko ku·mikchetanio a·dokni Additional Chief Secretary aro MATI-ni Director General Rebecca V Suchiang dilangaha.
2021 batch-ni gital MCS officer-rangna da·o jadokna ia MATI-o training-ko ra·anggen.
