TURA: Re·anggipa Budbar salo East Garo Hills a·jani Simsang chibima paksao donggipa song damsaoniko bilakbegipa AK automatic rifle baksana adita gulirangko mande saksaoniko man·aha.
East Garo Hills Police-oni koborko on·ani gitade, batanggimin somoirango bobil dake chakatgipa dolrang baksa jak donggipa mande saksa, GNLA bobil dolni dongnue donanggipa silchidarerangoni AK-81 rifle pongsako man·aha ine koborko man·soaha aro uandaken Budbar pringwalonin police-rang, Williamnagar samba jolo donggipa Sampalgre songona re·ange, Baley D Shira ba Bersly minggipa mandeko ua songoniko rim·na man·aha. Ia mandeoniko police-rang, AK-81 rifle baksana rong 36 gulirangko man·aha.
So·otgalako man·gipa GNLA-ni dilgipa Sohan D Shira, skangode Williamnagar jillako nigamgipa Durama a·brirangon donge, GNLA-ni bang·bea silchidarerangko, ia a·brini dingtang dingtang biaprango dongnue donangahachim aro uandaken uni siangani ja·mano police-rang, ia biaprangoniko bang·bea silchidarerangko man·ahachim ine nikna man·a.
