TURA: North Garo Hills a·jani Mendipathar-o a·dokni skanggipa Mega Food Park-ko kulina ma·mong sorkari chame on·manahani gimin Bristibar salo, Food Processing-ni Union Minister of State Rameshwar Teli, Garo Hills-ona re·bae ia Food Park-ko kulina dongimin biaprangko nie ra·angaha.
Food Processing-ni Union Minister of State-ko Garo Hills-ona rimchaksona gita dingtangmancha tom·aniko ia apsan salon, Tura-ni Christian Girls Higher Secondary School-o ong·atangaha aro ia tom·anio Garo Hills Autonomous District Council (GHADC)-ni Chief Executive Membor Benedic R Marak, Deputy CEM Nikman Ch Marak, Chairman Rakesh A Sangma aro pilak gipin MDC-rangba dongpae bak ra·angtokaha.
Ia tom·anio Union Minister of State, GHADC-ni membor-rangna aro tom·anio dongpagipa gipin manderangna aganprakangengon, a·doko skanggipa Mega Food Park-ko North Garo Hills a·jani Mendipathar-o kulina gita ma·mong sorkari tangka paisarangko chame on·aha aro Meghalaya a·dokna Mini Food Park-koba ma·mong sorkari on·angaha ine parakangaha.
North Garo Hills a·jao Mega Food Park-ko kulianichi dam 25 food processing unit-rangko kulina man·gnok aro Garo Hills-o man·enggipa dingtang dingtang bosturangko da·o a·songni dingtang dingtang biaprangona watatna man·gnok ineba Teli parakataha.
Ia food processing unit ge·prakan gong kror 10-mangni ong·gen aro ia gong kror 10-oni gong kror 5-kode Food Processing Ministry on·gen ineba ua parakangaha.
Tura-ona re·bana skang, Food Processing-ni Union Minister of State Rameshwar Teli, North Garo Hills a·jaonaba re·ange Mega Food Park-na kange dongimin biapko nie ra·angaha.
