SHILLONG: Meghalaya Energy Corporation Limited (MeECL)-o tangka jakkalsretanirangko aro ong·gija dakanirangko am·sandina gita sorkari inquiry commission-ko songe on·angani ja·man, jakgitele am·sandina man·na gita James Sangma-ko Power Minister ong·aoniko ra·galchina opposition Congress dol nangnikengoba, James-ko ra·galna gita National Peoples Party (NPP) jechakskaaha.
Inquiry-ko jakgitele dakna man·na gita James Sangma-ko ra·galgenma ine sing·on, inquiry-ko dakaniara sorkari baksa maming nangeani dongjawa ine NPP-ni state president WR Kharlukhi parakataha.
United Democratic Party (UDP)-ba MeECL-o tangka jakkalsretanirangko am·sandichina aro MeECL-ko dilna gita saksa ja·delgipa civil service officer-ko seokskachina Chief Minister-o dabiahaoba, James Sangma-ko ra·galani giminde mamingkoba janapa dongjahachim.
“Chingni dabianirangko sorkari knachake, inquiry-ko dakna commission-ko songaha aro MeECL-ni gital CMD-koba songaha,” ine UDP-ni general secretary Jemino Mawthoh parakataha.
Adita salrangna skangsan, Congress dolni dilgipa Zenith Sangma, MeECL-o ong·gija dakanirangko jakgitele am·sandina man·na gita a·dokni Power Minister James Sangma-ko ra·galchina sorkario dabiangahachim ine nikna man·a.
Sorkari official-rangni u·iatani gitade, inquiry commission-ko kamoni neng·takgimin judge dilanggen aro ia commission-o kamoni neng·takgimin sorkari officer saksa aro technical official saksaba membor ong·e donggen.
