SHILLONG: A·dokni dingtang dingtang a·jarango donggipa, bang·bea diltugipa songrango skul ka·anirang tik ong·jaenga, ine Congress-ni dilgipa, HM Shangpliang matnangatenba, iani bidingo sandirokaniko dakatchina gita ua a·dok sorkario dabiangaha.
Shangpliang, mni Sukrobar salo kobor ra·timgipa manderangna parakatengon, sorkarini kamo donatako man·gipa bang·bea skulni skigiparangan an·tangtangni dakna nanggni kamrangko tik ong·e ka·jaenga, indiba uamang sakgipina dormahako on·pile an·tangtangni palo skul ka·atskaengachim ineba ua matnangataha.
MLA-i parakani gitade, indakgipa skigiparangni simsakgija dakanichi songni nokni skulrango poraienggipa chatro-chatrirang bang·bataan neng·nikaniko chagrongna nangenga.
“Da·ororo, a·dok sorkarini niam gital ra·gatgipao, MTET matchotgiparangkosan skigipani kamna rakkiatgenchimode, maikaisa uamang, an·tangtangni kamko sakgipin, jean chu·onga gita bida-budi dongjachim uamangna pakwatskana bil donga,” Shangpliang sing·doaha.
Iandakgipa kamrangara, namgijagipa ba cha·bokgipa kam ong·ani gimin, iani bidingo namedake sandirokatchina aro iandakgipa skigiparangni kosako niam gita bichal ka·china ineba MLA raken dabiangaha.
Batanggimin chango a·doko skul poraigiparangni Performance Grading Index (PGI)-ko nike an·tangni kusi ong·gijaniko parakatengon, Meghalayao a·dok sorkarini jako ra·e challaienggipa skulrango, chatro-chatrirangni poraianio nangchapgipa bang·a nangchongmotgipa bostu ba ostrurang dongja, ineba ua agandapaha.
“Na·simang je somoioba diltugipa songadamrangona re·ange nikna gita man·gen, sorkarini jako ra·e challaienggipa bang·a LP skulrangon, gital skul nok, namgipa nokking, taridapna nangani aro namnamgipa asongchakani ba sechakanirangko nangenga.”
“Unigimin anga a·dok sorkariko, skulo poraigiparang aro skigiparangni namgnina obostarangko namdapatchina gita nangchongmotgipa kamrangko niroke pilak nanganirangkon on·china didiatenga,” ineba MLA dabianiko dakangaha.
Congress, songadamrango skul ka·a tik ong·gijako sandirokatchina dabia
Date:
Share post:
