TURA: COVID-19-na koros ong·aniko ma·sie ra·na gita Right To Information (RTI) ka·ani bidingo official-rang aganchakkujaenga ine Robibar salo Tura-ni BJP MDC Bernard N Marak parakataha.
Marak-ni parakatani gitade, COVID-19-na koros ka·aniko talate on·china gita BJP-ni membor-rang, West aro East Garo Hills a·jani district administration-o RTI ka·angahachim indiba da·onan uamangni RTI ka·anina official-rang aganchakaniko on·kujaenga.
A·songni Prime Minister Narendra Modi-ni dilanichi BJP sorkarini ra·gatgipa dingtang dingtang scheme-rangni giminba BJP, RTI ka·angahachim ineba Tura-ni BJP MDC parakataha.
“Kangal cholgrirangna sorkarini ra·gate on·gipa scheme-rangko darangba watchanggalani gri man·china chinga BJP-ni membor-rang nangnikenga maina Prime Minister-ni ku·rachakgimin scheme-rangko mitam kangal cholgrirangde man·tokjaenga ine chinga kobor man·soaha. Iani giminsa BJP, ia scheme-rangko chu·gimik jakkalama jakkalja, uko ma·sie ra·na gita RTI ka·aha,” ine Marak parakataha.
Adita salrangna skangsan, MLA aro MP scheme-rangni bidingo RTI ka·anina Tura Municipal Board (TMB) aganchakaniko on·aha indiba aganchakaniko on·anio scheme-rangko man·gipa manderangni bimingrangkode parakjaha ineba Tura-ni MDC parakataha.