TURA: Adita salrangna skang, Haryana a·dokni Gurugram hospital-o doctor aro nurse-rangni simsakgijani a·sel A·chik me·chik Rose R Sangma-ni siangani ja·man uni grigipa Samuel R Sangma-ba ong·na ampilgija siahani gimin Tura-ni Rongmitu/Rongrokgre Mahariba kalimpaaniko parakataha aro ia a·selni bidingo nanga gita am·sandianirangko dakenba, dos donggipa manderangni kosako rakgipa sastirangko on·china dabiangaha.
“Haryana a·dokni Gurugram hospital-o kam ka·enggipa doctor aro nurse-rangni simsakgijani a·sel chingni no-abirangoni saksa janggitangko gimaatna nangani ja·man uni grigipaba siangahani gimin chinga iano maiba ong·gija dakani dongna nanga ine chanchichipenga. Iandakgipa dukni somoio chinga sianggipa manderangni nokdangrangna chingni bakrimpaaniko on·atenga aro ia a·selni bidingo kakketko ma·sina man·na gita ta·raken am·sandianirangko dakchina dabienga,” ine Rongmitu/Rongrokgre Maharini president WR Sangma parakataha.
Iandake dosgri mande sakgnini janggirang gimana nangahani gimin ia Mahari, hospital-o kam ka·enggipa doctor aro nurse-rangni kamkoba raken jegalataha aro ia a·selni bidingo ku·rangko on·e sianggipa mande sakgnini nokdangna ka·dimeatanirangko on·engani gimin dingtang dingtang dolrangkoba mittelpilataha.
