SHILLONG: Meghalaya a·dokoba kam ka·giparangna sanna banani cholrangko on·gipa Employees’ State Insurance (ESI)-ko ra·gatchina didie, Sombar salo a·dokni Chief Minister Conrad K Sangma, ma·mongni Union Labour Minister Santosh Gangwar-na memorandum-ko on·angaha.
Ia sal somoirango COVID-19-ni giproroengani gimin kam ka·giparangna sanna banani cholrangko on·na gita a·dokoba ia ESI-ko ra·gatchina Chief Minister didiangaha.
Meghalaya a·doko ESI hospital-rang dongkujani a·sel a·doko songdongenggipa manderang aro mongsongbate sorkario kam ka·giparang, bank aro gipin company-rangni on·gipa medical insurance-rangosa pangchakkuna nangengani gimin, an·tangtangni sanna bananirangna bang·a tangka paisarangko koros ka·na nangkuengachim.
Ia Employees State Insurance Scheme-ni ning·o register ka·gimin manderangna chu·gimik sanna banani, samrang, tikarang aro hospital-rango donge sanna bananirangnaba dakchakanirangko man·rongachim.
Ia ESI Act-ni ning·o, kam ka·giparang jemangan gong 21,000 kingking dormaharangko man·achim, uandakgipa manderang ia ESI-ni ning·o on·enggipa dakchakanirangko ra·na man·achim.
