SHILLONG: Meghalaya Energy Corporation Limited (MeECL)-o tangka jakkalsretani aro pilak ong·gija dakanirangko nambate aro jakgitele am·sandina man·na gita a·dokni Power Minister James K Sangma-ko ra·galchina gita a·dokni Opposition Congress dol dabiangkuaha.
“A·dokni namgnina MeECL-o tangka jakkalsretani aro pilak ong·gija dakanirangko nambate aro jakgitele am·sandina man·na gita anga changsataie power minister-ko ra·galchina dabienga,” ine Congress dolni ku·wattimgipa Zenith Sangma parakataha.
Congress MLA-ni parakatani gitade, MeECL-o tangka jakkalsretanirangna aro gipin ong·gija kamrangna MeECL-ni gitcham Chairman-cum-Managing Director-kosan matnangaijahachim indiba power minister-koba apsan dake matnangahani gimin da·o MeECL-o ong·gija dakanirangko inquiry ka·na gitade da·o ong·enggipa power minister-koba ra·galchengna nangengachim.
“Power department-oba power minister-an bil dongbatgipa ong·e pilakni kosako sasonko man·gipa ong·a, uni gimin bil donggipa mandede Inquiry Commission-na on·enggipa pilak lekkarangkon kal·akna ba gimaatna man·aigen,” ine Sangma parakataha.
Self Identified Power Project (SIPP)-rangko ua jegalenga ong·ja indiba Expression of Interest (EOI)-ko on·ani bewalan ong·jaha ineba Congress dolna ku·wattimgipa parakataha.
MeECL-o man·dapanirangko bariatna gita maming ja·ku de·anirang dongjaenga ine sorkariko matnangatengon, da·o jaanti kajina gile man·aniara gong kror 80-oni gong kror 85-mangsan ong·enga indiba jao koros ong·aniara gong kror 110-mang ong·skaenga ine Sangma parakataha.
