SHILLONG: National People’s Party (NPP)-chi dilenggipa Meghalaya Democratic Alliance (MDA)-ni dilgiparangko dingtangatchina Opposition Congress dol, MDA-o bakrimenggipa dolrangko didiengon, dingtang dingtang department-rango tangka jakkalsretani bewalrangko bon·atna man·na gita ‘tangka cha·gipa’ minister-rangkon ra·galchina gita Meghalaya a·dokni BJP dol aganskaaha.
MDA sorkarini dilgiparangko dingtangatchina Congress dolni dabienggipani gimin janapatengon, iandakgipa obostao dilgiparangko dingtangatanide nangchongmota ong·ja indiba dingtang dingtang department-rangko tangka jakkalsretaniko bon·atna man·na gita tangka jakkalsretenggipa minister-rangkosa Cabinet-oniko ra·galna nangenga ine BJP-ni state president Ernest Mawrie parakataha.
“Chingaba MDA sorkarini bak ong·paengani gimin ‘tangka cha·rakgipa’ minister-rangko galchina anga CM-ko didina ska. Ua BJP, HSPDP, NPP, UDP ba PDF-niba ong·china indiba tangka jakkalsretgipa minister-rangkode ra·galna nangchongmota,” ine Mawrie aganaha.
BJP dol, tangka jakkalsretanirangko nie dongchana man·jawa ine janapatengon, tangka jakkalsretgipa manderangni kosako sorkari rakgipa ja·kurangko de·e sorkariko nambate chalaina nangengaha ine BJP-ni state president parakataha.
MDA sorkarini dilgiparangko dingtangatchina Congress dolni dabienggipani bidingo UDP-ni chief advisor Bindo M Lanong-ba aganchakaniko on·angengon, da·o ong·enggipa chief minister-ko dingtangatgenchimoba sawa uni biapko ra·na nambatgipa ong·gen ine sing·doangskaaha.
Da·o dipet MDA sorkarini dilgipako dingtangatani bidingo UDP chanchia dongkuja ine janapatengon, MDA-o bakrimenggipa dolrang, dilgipako dingtangatna nangnikenga ong·ode gipin dolrang baksa apsan chanchirimchengna nanggen ine Lanong parakataha.
Indake ong·engon, da·o dipet MDA sorkarini dilgipako dingtangatna nangani katta dongja ine MDA-o bakrimenggipa dolgipin HSPDP parakatskaaha.