TURA: Adhoc skulrangko deficit-ni gadangona ra·doatchina gita batanggimin somoirangnin sorkarina lekkarangko sedoengoba da·onan ia dabianiko chu·sokate on·na gisiko nangjaenga ine Meghalaya Upper Primary School Teachers Association (MUPSTA) Garo Hills Region, sorkarini kamna suk ong·gijaniko parakataha.
MUPSTA-GHR-ni parakatani gitade, iani bidingo association-ni dilgiparang, bilsi gittamna skangan sorkarina memorandum-rangko on·e, a·dokni Chief Minister, Education Minister, Union Human Resource Minister aro Union Social Justice & Empowerment (NE in-charge)-naba changni chang gisik ra·ataniko on·angahachim indiba da·alonan adhoc skulrangko deficit-ni gadangona ra·doatchina dabianiko sorkari knachakkujaengachim.
“Ia 2021 bilsini gnigipa bakode dingtanganiko niknaba gnang ine chinga ka·donge nisengengachim indiba skigiparangna apsan tangka paisarangkon chamtaiahani gimin skigiparang namen suk ong·tokjaha,” ine MUPSTA-GHR-ni dilgiparang parakataha.
SSA-ko a·bachengna skangan ritchani ritcha adhoc skulrangko kuliahachim ine janapatengon, adhoc skulrangkode nichanggale sorkari, SSA skulrangnasa kamko ka·batenga ine MUPSTA-GHR-ni dilgiparang, suk ong·gijaniko parakataha.
“Adhoc skulrango skigiparangna bate 2000 bilsini ja·man kuligipa skulni skigiparangsa bang·bate dormaharangko man·enga indide chinga maikai iako ra·chakna man·gen,” ine skigiparang sing·doangaha.
MUPSTA-GHR-ni parakatani gitade, 1997 bilsionin a·doko adhoc skulrangoni ge·sakoba namdapata dongkuja aro bang·a skul nokrangan da·o obosta namsrangjaengahachim.
