TURA: West Garo Hills a·jani dingtang dingtang department-rango kam ka·enggipa manderangko COVID-ni tikarangko su·china didina gita Budbar salo West Garo Hills a·jani COVID-19-na dongimin District Task Force Immunisation (DTFI)-ni tom·aniko DRDA Conference Hall-o ong·atangaha aro ia tom·anio dingtang dingtang department-ni officer-rang baksana Nokma Council-ni president SG Momin aro gipin dolni dilgiparangba dongpae bak ra·angaha.
Ia tom·aniko ong·atani bidingo West Garo Hills a·jani Deputy Commissioner Ram Singh, jinmana talate on·angengon, Meghalaya sorkarini ning·o donggipa Personnel & AR (A) Department baksana Health & Family Welfare department-ni ge·etanio pangchake, pilak sorkari aro private office-rango kam ka·giparangko COVID-ni tikarangko su·e ra·china didienga ine parakataha. Department-tangtango kam ka·giparangni tika su·a su·gijaniko nirok sandichina git aua dingtang dingtang department-ni officer-rangkoba ge·etangaha.
Health department aro Personnel department-ni on·gimin ge·etanirangko talate on·angkuengon, office-rango kam ka·enggipa manderang, jemangan COVID-ni tikarangko su·na sikjaengachim, sal 10-prakon RT-PCR test-ni report-ko an·tangtangni officer-rangna on·skana nanga ine Deputy Commissioner parakataha.
West Garo Hills a·jani bang·bata biaprangon da·o tika su·giparang bang·batengahaoba mitam biaprangode da·oba tika su·na gita jechaktokengkua ine janapatengon, tikako su·anichisan an·tangtangni dedrangko aro an·tangtangko ia sabisioniko naljoke rakkina man·gen ine Ram Singh, pilakkon tika su·e ra·china gita didiangaha.
Dingtang dingtang songrango tikarangko su·na man·na gita kamrangko nirokatchina ua Nokma Council-ni president-ko didiangskaaha.
Ia tom·anio West Garo Hills a·jani District Immunisation Officer Dr Ivonne M Sangma, a·jao tika su·gimin manderangni bidingo talataniko on·angskaengon, tikarangko a·jani pilak hospital-rang, CHC-rang, PHC-rang aro gipin biaprangoba su·enga aro da·o dipet West Garo Hills a·jao skanggipa tikako sak 1,31,780 aro gnigipa tikakoba gimik sak 18,607 su·e ra·tokmanaha ine parakangaha.
