TURA: Re·anggipa Bristibar salo, Tura district jail-o donako man·enggipa koidirangko district COVID surveillance dolrang, porikka ra·e nianio sak 14 koidirang positive ong·aha.
West Garo Hills a·jani Deputy Commissioner Ram Singh-ni u·iatani gitade, Ri Bhoi jail-o COVID batrikrikaniko nikenba, Tura district jail-o donako man·enggipa koidirangkoba porikka ra·e nion sak 14 koidirang positive ong·aha.
“Tura district jail-o donako man·enggipa koidirangko aro jail-o kam ka·enggiparangko RT-PCR-chi porikka ra·e nion sak 14 koidirang positive ong·aha. Positive ong·gipa sak 14-oni sakbriosan chinrangko nikna man·aiachim. Tura jail-o COVID man·giparangko jail ning·aon dingtang donattokaha,” ine Deputy Commissioner parakataha.
Tura district jail-o donako man·enggipa koidirangoni sakgni ba sakgittamde be·enni gita saanirang dongani gimin tikarangko su·na man·kuja indiba jail-o donako man·enggipa gipin koidirang aro jail-o kam ka·giparangnade gimiknan tikarangko su·aha ineba Singh parakataha.
Deputy Commissioner-ni parakatani gitade, Tura district jail-o donako man·enggipa sak 200-na baten koidirang COVID-ni skanggipa tikako su·e ra·mantokaha.