TURA: Tura-o Central Agriculture University (CAU)-ni ning·o donggipa Community Science (Home Science) College-ni Dean Puspita Das, an·tangna chonbatgiparangko aro college-ni chatrirangko kragija dake jakkalenga ine jinmana parak ong·ani ja·man, uko kamoniko ra·galchina aro niamo pangchake rim·china gita Garo Hills-ni dolgittam NGO-rang, chong·motan GSU, AYWO aro FKJGP dolrang dabiangaha.
Tura Community Science College-ni Dean, an·tangni ning·o kam ka·giparangko aro college-o poraienggipa chatrirangko, nokni kamrangko ka·atenga aro an·tangni be·enrangko kragija dake nol·atenga ine adita salrangna skangsan college-o poraienggipa chatrirang aro kam ka·giparang badi ka·doangahachim aro iani ja·man ia college-ni Dean-ko kamoniko ra·galchina aro uni kosako nanga gita sastirangko on·china dingtang dingtang dolrang dabitokengachim ine nikna man·a.
Indake ong·engon, ia Home Science college-ni Dean Puspita Das, saksa Tribal-rangko mikchepgipa mande ong·e ru·uta somoirangonin college-o kam ka·enggipa aro poraienggipa Tribal-rangni kosako kragija kamrangko ka·enga ine dolgittam NGO-rang parakatenba, ia Dean-ko Tura Home Science College-oniko ra·galchina gita Central Agricultural University-ni Vice Chancellor-na sedoataha.
“Tura Home Science College-ni Dean, an·tangna on·gimin bilko ong·gija dake jakkalsretengani gimin una kragipa bichalko on·na nangchongmota. College-o kam ka·enggipa aro poraienggipa Tribal chatrirangni kosako iandake ong·gija dakanirangko chinga NGO-rang nie dongchajawa aro ia Dean-ni kosako raken jegalanirangko dakangkugen,” ine GSU-ni president Tengsak G Momin parakatenba, ia Dean-ni kosako SC/ST Act 1989-ni ning·o rakgipa ja·kurangko de·china police-rangko aro CAU-ni official-rangko didiataha.
Ia Dean-ni kosako Tura Women Police Station-o badi ka·manahani gimin Indian Penal Code-ni niamrango pangchake sastirangko on·china gitaba NGO-rang dabiangaha.
Ia Dean-ni kosako maming ja·kurangko de·jagenchimode GSU, AYWO aro FKJGP dolrang, university-ona re·ange jingjengatgen ineba dolgittam NGO-rang mikrakataniko on·angaha.
