TURA: North Eastern Hill University (NEHU)-ni dingtang dingtang porikkarangko seenggipa chatro chatrirangni mark sheet-rango sesretanirangko nikna man·rongengani gimin iandake mark sheet-rango sesretanirangko namdapatchina didie Garo Hills-ni dolgittam NGO-rang, chong·motan Garo Students Union, A·chik Youth Welfare Organisation (AYWO) aro Federation of Khasi Jaintia & Garo People (FKJGP) Garo Hills Zone, a·dokni Chief Minister Conrad K Sangma-na sedoataha.
Ia dolgittam NGO-rangni parakatani gitade, mark sheet-rango sesretanirangko chatro chatrirang aro uamangni ma·a paarang, NGO-rangna u·iatskaaha.
“Ia sal somoirango sajinmani a·sel NEHU-o chu·gimik ong·gija 30 percent-chisa kamko ka·na nangenga ine chinga ma·sia indiba chinga mark sheet-rangko sesretenggipani bidingo chatro chatrirangoniko aro ma·a paarangoniko bang·en badi ka·anirangko man·soenga,” ine dolgittam NGO-rang parakataha.
NGO-rangni parakatani gitade, mark sheet-rangko taridapna gita NEHU, July-ni 15 tarikkon bon·kamgipa tarik dake donahachim indiba mitam chatro chatrirangni mark sheet-rangko taridapenba mitam chatro chatrirangni mark sheet-rangkode taridapskakujaengachim.
“Degree porikkarangko segipa chatro chatrirangni badi ka·doangani gitade, uamangoni mitam internet gita aro mitamrang college-rango porikkako seenba, an·tangtangni segimin lekkarangko submit ka·manaha. College-rango uamangni segimin answer script-rangko nimanpilahaoba mark sheet-rangode mitam chatro chatrirangko ‘absent’ seskaaha,” ine NGO-rang parakataha.
Mitam chatro chatrirangna NEHU, ong·gija subject-rangnasa admit card-rangko on·skaaha aro bang·bata chatro chatrirangan an·tangtangni sena nanggipa subject-rangko setokahaoba uamangko ‘absent’ seskaaha ineba dolgittam NGO-rang parakataha.
‘Absent’ segipa mark sheet-rangchi maikai master degree course-rangna admission-ko ra·na man·gen ineba NGO-rang sing·doangaha.
“Iandakgipa sesretanirangko Tura-ni dingtang dingtang college-rango aro mongsongbate Tura Govt College-o nikna man·batenga. Meghalaya a·dokni gipin biaprango iandakgipa sesretanirang dongjaenga ong·ode maikai Garo Hills-osan ong·skaenga?” ine NGO-rang sing·doangenba, chatro chatrirangni namgnina iandakgipa dakgualanirangko namatchina Meghalaya sorkari aro NEHU-ko didiangaha.