SHILLONG: Re·anggipa June jao Haryana a·doko A·chik sakgnini siani a·selko am·sandina gita Union Home Affairs Ministry, Central Bureau of Investigation (CBI)-na pakwate on·na manchiangaha.
Re·anggipa jao Nagaland a·dokoni A·chik sakgni, chong·motan Rosy Sangma aro Samuel Sangma, Haryana a·dokni Gurugram-o ong·na kragija bewalo siangani ja·man salgro salaram a·dokrangoni dingtang dingtang dolrang, ia a·selko jegalatenba, ia a·selni bidingo CBI-chi am·sandiatchina a·songni Prime Minister Narendra Modi aro Union Home Minister Amit Shah-na sedoatahachim ine nikna man·a.
Salgro salaramni dingtang dingtang dolrangsan ong·aigija ia a·selni bidingo Meghalaya a·dokni Governor Satya Pal Malik, Chief Minister Conrad K Sangma, Tura-ni MP Agatha K Sangma, Opposition dolni dilgipa Mukul Sangma aro gipin dilgiparangba ma·mong sorkarina sedoattokahachim.
Indake ong·engon, ia a·selni bidingo kakketko ma·sina man·na gita ma·mongni Union Home Affairs Ministry, CBI-chi am·sandiatna manchiangahani gimin a·dokni Chief Minister Conrad Sangma, Union Home Ministry aro Union Home Minister Amit Shah-ko mittelpilataha.
Koborko on·ani gitade, Rose Sangma aro Samuel Sangma ma·desa Assam a·dokni Karbi Anglong-o songdongkamgipa A·chikrang ong·achim indiba uamang da·o Nagaland a·dokona apjitangskae, uano dongengachim.
Re·anggipa jao Rose Sangma saahani gimin uko Samuel, Delhi-ni private hospital-ona rimangahachim indiba ja·mano ua saa bilongbatna a·bachengahani gimin June 24 tariko uko Gurugram-ni Sector 10-o donggipa Alfaa Hospital-ona ra·angskaahachim. Hospital-o sannaniko man·e Rose an·sengbapilengahachim indiba ua hospital-o doctor aro nurse-rangni mikkangon ice cream cha·ani ja·man rang·gitik saa bilongbataie siangna gita nangaha.
Iani bidingo Samuel Sangma, sagipa mandena ice cream on·ani gimin doctor aro nurse-rangko sing·doon, doctor-rangoni saksa uko kragija dake dokaha aro salgipino ong·na kragija dake uni manggisikoba uni dongchakenggipa hotel kuturionikosa dingdee dongako man·aiahachim.
