SHILLONG: Meghalaya Energy Corporation Limited (MeECL)-o tangka paisarangko jakkalsretanina matnange a·dokni opposition Congress dol, a·dokni Chief Minister Conrad K Sangma-koba ra·galchina dabiangaha.
“An·ching an·chingni nitogipa a·dokko chel·chakna nangnikbebeenga ong·ode ja·manchakna skangan a·dokni Chief Minister ong·enggipako ra·galani somoi ong·engaha ine anga sorkario namana chanchienggipa mande sakantikon ku·mongrimna ska,” ine Sombar salo, Congress dolni ku·wattimgipa aro Rangsakona-ni Congress MLA Zenith Sangma parakataha.
A·doko songdongenggipa manderangan pilaknin nokgipa ong·ani gimin iani bidingo Congress dol, manderangni kacharionaba ra·anggen ineba Sangma parakataha.
Congress MLA-ni parakatani gitade, Saubhagya Scheme-o ong·gija dakgipa kamrangni a·sel gong kror 149-na baten noksan ong·na nangaha ine adita salrangna skang CAG-ni report-ko parakanian a·doko songdongenggipa manderangna mikrakatani gita ong·ahachim.
Sorkarini jakgitelgipa Inquiry Committee-ko songaniara dakmikanisan ong·aia ine matnangatengon, ia committee-ni technical membor-ba REC Ltd-ni gitcham executive director-sa ong·a aro ia official-ara Saubhagya aro gipin scheme-rangko man·gipa M/s Satnam Global Infra Ltd baksa meligipasa ong·a ine Sangma parakataha.
“Uamang saksa sakgipinko ma·sigiparangsa aro meligrikgiparangsa ong·genchimode maikai ia inquiry-ara jakgitelgipa ong·kugen?” ine Congress MLA sing·doangenba, iani giminsa inquiry-ko dakna gita CBI-na pakwatchina Congress dabiengachim ine talataniko on·angaha.
Power Minister James K Sangma-ko ra·galna Chief Minister-ni jechakenggipani bidingo janapatengon, ong·gija dakanio jak donggipa minister-kon ra·galchengja ong·ode maikai ia inquiry jakgitelgipa ong·kugen ine Sangma matnangataha.
“Ia pilakan chief minister-ni dilanichisa ong·enga aro uamang pilak kamrangkon an·tangtangni namnikgipa contractor aro company-rangnasa on·e a·dokna noksan ong·aniko ra·baenga,” ine Congress MLA parakataha.