TURA: West Garo Hills a·jani Jengjal-o aro South West Garo Hills a·jani Okkapara jolrango muga jile cha·enggiparangna agan-ku·pattianirangko aro muga jilanio jakkalgipa ma·manti bosturangko on·e dakchakna gita re·anggipa July-ni 12 tariko Tura Central Silk Board-ni ning·o donggipa Muga Eri Silkworm Seed Organisation (MESSSO) P4 Unit-ni gita Livelihood Improvement Program-ko ong·atangaha.
Ia program-ko ong·atanio NEHU Tura campus-ni Pro-Vice Chancellor Dr G Singaiah mongsonggipa sokgipa ong·e bakko ra·angaha aro ia tom·anio jinmana aganprakengon, pangkamgipa janggi tangani cholrangko man·na gita an·tangtangni changa sapanirangko namdapatchina muga jile cha·enggipa manderangko didiangaha. Muga jile cha·enggipa manderangna NEHU-ni gitaba pilak man·a dakchakanirangko on·anggen ineba Prof Singaiah ku·rachakaniko on·angaha.
Ia program-ko ong·atanio NEHU Tura campus Incubation Centre-ni Nodal Officer Dr R Sasikumar-ba dongpae jinmana aganprakengon, iandakgipa program-rangoniko skie ra·e an·tangtangni kamrangko apalbatatchina muga jilgiparangko didiangaha.
Ia program-ko ong·atanio dongpae jinmana aganprakanggipa gipin manderangara, Tura-ni DSO Sanre G Momin, MESSO P4 Unit-ni Scientist-B Dr K Indirakumar, Tura Weaving & Training-ni Resource Person Vivien A Sangma aro gipinrang ong·a.