TURA: Bilsianti manirongbaenga gitan ia changoba chang 103-gipa Recruit Day Celebration ba Garo Labour Corps Day-ko mijal Sukrobar pringni bako Tura-ni Babupara-o tarie dongipa Cenotaph-o gisik ra·e maniangaha indiba ia chango Coronavirus (COVID-19)-ni giproroaniko champengna dongimin niamrang dongani gimin jinmako okamgija adita dilgiparangsan dongpae gisik ra·aniko dakangskaaha.
Ia manianio Tura Municipal Board (TMB)-ni Chairman JD Sangma, TMB-ni Chief Executive Officer (CEO) Rikse R Marak, Extra Assistant Commissioner Dimseritha A Sangma, Deputy Superintendent of Police KR Marak aro gipin dilgiparangba dongpae bakko ra·angaha aro First World War ba a·gilsak gimikni skanggipa dakgrikaniona re·ange janggitangtangko gimaatgipa aro dangdike on·gipa manderangko gisik ra·e mande ra·pilskaanirangko dakangaha.
Ia manianio Goeragre-o donggipa 2nd MLP Battalion-ni gitaba salamko ka·e mande ra·pilskaaniko dakangaha.
First World War ba a·gilsak gimikni skanggipa dakgrikanio kamrangko ka·timna gita France a·songona re·ange sokbapilgiparangko aro sianggipa manderangko gisik ra·na gita bilsiantian July-ni 16 tariko ia Recruit Day Celebration ba Garo Labour Corps Day-ko manirongenga ine nikna man·a.
A·gilsak gimikni skanggipa dakgrikanio India a·songo British sorkarini ge·etaniko man·e, sak 500 A·chik matgrikrang, British aro gipin dolrangna kamrangko dakchake on·na gita France a·songona re·angahachim indiba ia sak 500-oni sak 456 matgrikrangsan France a·songona sokangaiahachim.
Ia First World War 1918 bilsini May 25 tariko bon·ani ja·man A·chik matgrikrang songtangtangona re·bapilon, France a·songona sokanggipa sak 456 matgrikrangoni sak 120-san Tura-ona sokbapilaiahachim.
