SHILLONG: Meghalaya a·dokni skotong songjinma Shillongo, to (petrol aro diesel)-ni damrang gong ritchasa gapnasipile bariattaiahaon, songdonggipa manderangni mongsongbatgipa chanchina nangbeani sokenga ine koborna parakataha.
Songjinma aro a·dokni dingtang dingtang bakrango toni damrangko bariatjringengani gimin, ia covid sabisina neng·nikani somoirango a·doko songdonggipa manderangna pil·sa gita neng·nikaniko on·dapengako nikna man·enga.
Mejal Sonibar salo songjinmao, petrol liter-sani dam gong 96.88 aro diesel-ni damara gong 88.65-ona sokdoaha. Uandake songjinmao power petrol-ni damara gong 100 batpilaha aro apsankon mejal Sonibar salo gong 100.40 palskaengachim.
Indake ong·engon, a·dok sorkari petrol liter-prakoniko 20 percent ba liter-prako gong 15, badia batkala ukon ra·rikenga. Uandake, diesel liter-prakni damo sorkari 12 percent ba gong 9 kai ra·rikskaenga ine koborna parakaha.
Skango a·dok sorkari, petrol liter-prakon 31 percent kajinako ra·a aro apsandake diesel liter-prakoniko 22.5 percent kajinarangko ra·achim. Jagnina skango Shillongo petrol-ni dam gong 89 aro diesel-ni damko liter-prako 83 kae palengachim ine nikna man·aha.
Uandake, toni damrangko bariatjringenganiara songjinma ba jolo gari-gurarangko para sale cha·paenggipa manderangna neng·nikaniko sokatan baksa, uamangni namedake chanchina nangaona sokatskaenga.
Iani bidingo Meghalaya Joint Action Committee of Commercial Vehicle (MJACCV)-ni chairman, Jyrwa parakatengon, “a·doko songdonggipa sakantini namgnina toni damrangko komiatna nangenga,” ine aganaha.
Uni parakatani gitade, committee, iani bidingo su·utgija salrangni gisepon apsan tom·e chanchirimaniko dakanggen, maina committee a·doko toni damko bariatjrngengani bidingo da·o dipet mikkangchi maiko dakanggen uarangni gimin chanchirima dongkujaenga ine ua aganaha.
