NEW DELHI: North-Eastern Hill University (NEHU)-na gital Vice Chancellor (VC)-ko seokkujaengani bidingo university aro a·doko golmal ong·engani somoio Meghalaya-ni Health Minister changsatai, ia mamlako ma·mong minister-ona ra·doangaha. Health Minister AL Hek, ma·mongni gital Health Minister Dharmendra Pradhan-ko grongao, university-na gital VC-ko seokna mol·molaha.
Hek, NEHU-ni da·o ong·enggipa aro interim VC Prof SK Srivastava-ni biapo sakgipinko donskachina bang·a changon ma·mongni minister aro BJP-ni a·gipi dilgiparang baksa agangrikaha.
NEHU Vice Chancellor-ni post bangbang ong·e dongenga aro 1973 Act-ni niamo pangchake University, bangbang ong·e donggipa post-ko gapatna gita, Executive Council -ni ra·chakgimin bimingrangko on·aha. A·dok sorkari, an·tangni gitade chu·gimik kamrangko matchotaha aro Education Department-ni Prof Sherwin May Sungoh-ko NEHU VC seokna ma·mongni ra·chakataniko nichake dongenga.
Da·o VC-ni kamko jako ra·enggipa Prof SK Srivastava-ni term bilsi 2020 September jao bon·aha indiba gital VC dongkujani gimin kamko jako ra·angkuchina aganaha.
Indake ong·engon panel-na on·gimin sakbongaoni sakgittamkode gipin biapo seokskaha. Mikkangchi tribal VC-ko seokchina politician-rangba chakpaenga uasan ong·aigija local association aro gipin dolrangba tribal VC-ko seokchinan chakpaenga.
University-ni chu·gimik ge 467 teaching post-oni ge 157 post bangbang ong·e dongenga, jekon gapatna nangenga ineba Hek agandapaha. Indake ma·mong minister, ia mamlako nirokgen ine ka·dongataha.
