TURA: Bangladesh a·songni A·chik me·tra saksa, Australia a·songo A·chikrangoni skanggipa ukilni kamko man·aha.
Ia A·chik me·trani bimingara Eleanor Rema Marak ong·a aro una adita salrangna skangsan Australia a·songo ukil-ni degree-ko on·aha.
Koborko on·ani gitade, 1993 bilsio uni bilsi 5 ong·kuengpition uni nokdang, Bangladesh a·songoni Australia a·songona apjitangaha aro uandaken da·o uni nokdang Australia a·songon songdongkamengaha.
Adita salrangna skang Eleanor, Bangladesh a·songni TV channel baksa agangrikatengon, da·o uamang Australia a·songosa songdongengahaoba Bangladesh a·songan uni atchiram ong·aha ine parakataha.
Darang jat aro a·songni manderangan gimik dakgipa chol aro kakket bichalko man·na nangchongmota ineba Eleanor aganaha.
Eleanor-ni aganani gitade, uni ma·drangrangoni mitamrangde United States, Canada, Australia, India aro Bangladesh a·songo songdong a·chatokenga.
“Angni ma·gipani nokdang, Bangladesh a·songo Mymensing a·jani Birishiri jolo donggipa Nana Garo jatoni skanggipa college degree-ko man·aha aro angni ma·gipa Bachelor of Arts degree-ko man·e joltangni skulon skigipani kamko ka·enga. Angni pagipaba university-ni gadango degree-ko man·chenggiparangoni saksa ong·e angni lekka poranio pangnan angna dakchakanirangko on·aha,” ine Eleanor, an·tangni chu·sokgipa ong·anina an·tangni ma·a paako mittelpile aganaha.
