TURA: Meghalaya a·doko Pradhan Mantri Garib Kalyan Anna Yojana (PMGKAY)-ni kamrangko nirokna gita Tura-ni MDC Bernard N Marak-ko seoke donangaha.
Koborko on·ani gitade, kangal cholgrirangna ma·mong sorkarini ra·gatgipa PMGKAY-ko nambate chu·sokatna man·na gita ma·mongo BJP-ko dilgiparangni ge·etaniko man·soenba, Tura-ni MDC Bernard Marak-ko in-charge dake aro BJP-ni sakgipin membor David Kharsati-ko co-in charge dake BJP-ni state president Ernest Mawrie songe donangaha.
“Ia scheme-ni bidingo maiba badi ka·na nanganirang donggenchimode kosako janapatgimin manderangna seachi u·iatna man·gen aro uamang kamrangko niroke ka·anggen. Ma·mong sorkarini ra·gate on·gimin scheme-rangko man·na kragipa manderang man·china BJP kamko ka·enga,” ine BJP dolni dilgiparang parakataha.