W’nagar-o doctor-rangko on·chenggija kam ra·jitjachina NGO-rang dabia

TURA: East Garo Hills a·jani Williamnagar civil hospital-o doctor-rangko songe on·chenggija hospital-ni doctor-rangko gipin biaprangona ra·jitangengani gimin Williamnagar-ni dingtang dingtang NGO-rang, chong·motan GSU, FKJGP aro FAF dolrang, sorkarini kamko jegalatenba, doctor-rangko songe on·chenggija doctor-rangko gipin biaprangona ra·jitangjachina dabiangtokaha.
Koborko on·ani gitade, Williamnagar civil hospital-na doctor-rangko on·chenggija ia hospital-ni psychiatrist aro eye specialist-ko gipin biapona ra·jitangahani gimin NGO-rang, sorkarini kamko jegalna gita Williamnagar-o poster campaign-ko ong·atangaha.
“Hospital-o doctor-rangko songe on·chenggija gipin biaprangona ra·anganiko chinga raken jegalenga. Batanggimin somoirangoba iandake doctor-rangko songe on·chenggija hospital-o kam ka·enggipa doctor-rangko gipin biaprangona ra·jitangahani a·selan East Garo Hills a·jao bang·en neng·nikanirangko chagrongna nangahani gimin da·o chinga iandake dakna on·jawaha. Gipin biaprangona ra·jitanga man·gipa doctor-rangni biapo ta·raken gipinrangko songe on·china chinga dabienga,” ine GSU Williamnagar-ni president Saljrang Tengrik Marak parakataha.
East Garo Hills a·jao me·chikrangni kosako ong·gija dakanirang batroroengani gimin iandakgipa case-rangko jako ra·e nirok sandina man·na gita me·chik police officer-rangko songe on·china gitaba NGO-rang, sorkario dabiangaha.
“Da·o dipet Williamnagar-o SI rank-ni police officer sakgnisan dongengpiti aro uamangan me·chikrangni kosako ong·gija dakani case-rang baksana pilak kamrangkon ka·na nangenga. Uni gimin a·jao songdongenggipa manderangni namgnina me·chik police officer-rangko songdape on·china chinga mol·molenga,” ine NGO-rang, chief minister-na sedoatgipa chittio parakataha.