SHILLONG: Dadenggre a·jani National People’s Party (NPP)-ni dingtang dingtang dilgiparang, a·jatangni MLA Pa James K. Sangma baksa Sombar salo Meghalayani Chief Minister Pa Conrad K. Sangmako Shillongo grongenba, Dadenggre Civil Sub-Division-ko District gital song·china gita dabie memorandum see on·aha.
Dadenggre Civil Sub-division, a·dokni gitchambatsrangipa sub-division-rangoni ge·sa ong·a, jean 1982 bilsio bimang ong·baaha. Adita bilsirangonin Dadenggreko District-ona ra·dona gita NPP-ni dilgiparang aro Dadenggreni manderang apsan ku·cholsan ong·e neng·takgija dabienga. “Da·alo, NPP Dadenggre unit ni palo, chinga Chief Minister Pa Conrad K. Sangmako gronge Dadenggre District-ko bimang ong·atnachina gita memorandum-ko on·angaha,” ine NPP Youth General Secretary, Dadenggre Block-ni dilgipa Sorojit Momin aganaha.
“Chief Minister-ni namgipa ku·pattianirangko man·e chinga bilongen kusi ong·bejok” ineba ua aganaha. Chief Minister-ni ia nambegipa ku·chakani aro aganchakanirang Dadenggreni manderangna ka·donganiko ra·baa, jean Civil Sub-division-ko dal·roroatna gita bimchipbee kamko ka·tokenga. “Chinga gisik ka·tong gimikchi Chief Minister Conrad Sangmako, uni gamchatbegipa somoirangko choljokatanina aro chingni dabianirangna namgipa ku·pattianirangko on·anina dingtangmancha mittelna ska” ine Dadenggreni MLA Pa James K. Sangma aganaha.
