SHILLONG: COVID-19 giproroengmiting somoirango lockdown-rangko ra·gatengani a·sel kangal cholgrirang aro mongsongbate salprakna hajira ka·e cha·enggipa manderang neng·nikanirangko chagrongna nangtokengoba a·dok sorkari, maming dakchakanirangko on·na gisiko nangjaenga ine Thma U Rangli-Juki (TUR)-ni dilgipa Angela Rangad, MDA sorkariko matnangenba, Sombar salo lekka pal·takrangko ra·bite, Meghalaya Secretariat mikkango saksan jingjengatangaha.
Rangad-ni parakatani gitade, da·o gita sabisirang giproroengmiting somoio a·doko songdongenggipa manderang aro mongsongbate kangal cholgrirang neng·nikanirangko chagrongna nangtokengoba sorkari maming dakchakanirangko on·na gisik nangjaengani gimin ua sorkarini kosako jingjengataniko dakna draatako man·aha.
Batanggimin bilsio Meghalaya a·dokoba COVID-19 giproroani somoio lockdown-ko ra·gatna nangani a·sel hajira ka·e cha·enggipa manderang, neng·nikanirangko chagrongna nangtokahani gimin a·dok sorkari, Chief Minister’s Relief Against Wage Loss (CMRAWL)-ko ra·gate taxi-rangko sale cha·enggiparangna, ramarango bading chiwale cha·enggiparangna aro hajira kam ka·e cha·enggiparangna gong 2,100 ka·e dakchakaniko on·na parakatahachim ine janapatengon, iani bidingo, ua RTI ka·e am·sandianirangko dakon, ia scheme-na dorgasto galgipa bang·bata manderangni bimingan nakatjaha aro biming nakatgipa manderangoniba bang·bata manderangan tangka paisarangko man·tokjaha ine TUR-ni dilgipa janapatenba, tangkarangko man·pagiparangba gong 2100-oniko gong 700-kosan man·tokaiaha ine parakataha.
“Iani giminsa anga da·ode salantian sorkarini dakna nanggni kamrangko gisik ra·atna gita Secretariat mikkangona re·bae sorkarini kosako jingjengatna manchiangaha. Kangal cholgrirangna ku·rachakgimin tangka paisarangko sorkari ta·raken on·na nanga,” ine Rangad aganaha.
Meghalaya a·doko obostarang namsrangkujaskal sorkari, kangal cholgrirangna dakchakanirangko on·na nanga ineba Rangad dabiangaha.
