TURA: Tura-ni dingtang dingtang gittimrango COVID man·giparang batroroengani gimin Mongolbar salo West Garo Hills a·jani Deputy Commissioner Ram Singh, District COVID Management Committee baksa tom·e chanchirimangenba, case bang·batenggipa gittimrangko containment zone dakatna tik ka·angaha.
Deputy Commissioner-ni u·iatani gitade, je gittimrangon COVID man·gipa manderang sak 20-na bate dongengachim, uandakgipa gittimrangko containment zone dakatchina gita district surveillance officer ku·pattianiko on·ani ja·man Dakopgre, Burny Hills, Spring Hills, Wadanang aro Matchakolgre gittimrangko containment zone dakataha.
Je biaprangon COVID-ni tikarangko su·giparang komibateng, uandakgipa biaprangosa COVID man·giparang batenga ineba Ram Singh parakataha.
“Je biaprangon manderang COVID tikarangko su·na jechaktokengachim, uandakgipa biaprangosa COVID man·giparang batenga. Tura Bazar, Chandmary aro Bonepa jolrango songdonggipa manderang bang·genchimoba, ia biaprangode tika su·ani da·o 100 percent gapna siengahani gimin COVID man·giparang komiskaengaha,” ine Deputy Commissioner parakataha.
Gittimtangtango songdongenggipa manderangko tika su·e ra·china didichina gitaba DC, dingtang dingtang gittimni development committee-rangko didiatskaaha.
Modynagar-koba Budbar salo tika su·ani ja·man containment zone dakatgnok ineba DC parakataha.
