SHILLONG: Candidate-rang jemangan Meghalaya Teacher Eligibility Test (MTET)-ko pass ka·aha uamang da·o bilgniprako test setaina gita nangjawa janggi tanga gimikna choliaignok.
Iako mija Mongolbar-o Education Minister Lahkmen Rymbui u·iatao iani bidingo u·iataniko ia antio parakatgen ine aganaha.
Sena sienggipa MTET porikkani gimin, aganao test seani sal tariko tik ka·na sal 10-ni gisepo gitalgipa u·iataniko on·gen aroba jemangan personal interview-ko matchotja bangbang ong·e biap donga ong·ode dorksto on·taina nanggen ine Rymbui, candidate-rangna aganaha.
Jemangan MTET pass ka·ja uamang skigipani kamko man·taipilgenma ine sing·anina aganchakao, jean je obostaoba kamo rakkia kamna rim·piltaiani kamo kam ka·angna mamla ong·naba donga, minister aganaha.
Gipin cholrangko nakatatna uamang jotton ka·aha, ua agandapaha.
