SHILLONG: Ma·mongni Home Minister Amit Shah, da·al Salgro Salaram a·dok gimikni Chief Minister-rang baksa tom·e chanchirimgen, chanchirimanio sima arirangni golmalrangni giminba man·chapangnaba donga.
Sukrobaro official-rangni parakani gitade, Salgro Salaram a·dok gimikni Chief Minister, Chief Secretary aro police-ni skotong dilgiparang baksa Shah da·al damsan agangrikgen aroba a·dokska baksa sima arirangni bidingo nanggrikenggipa mamlarangni bidingoba agangrikangnaba donga.
Assam, Meghalaya, Tripura, Nagaland, Manipur, Mizoram, Arunachal Pradesh aro Sikkim a·dokrangni gisepo a·doksa a·dok gipin baksa sima arini bidingo meligrikgijanirang ong·enga.
Assam, da·odipet Arunachal Pradesh, Meghalaya, Nagaland aro Mizoram a·dokrang baksa sima arini bidingo golmalrang ong·enga.
Home Minister Amit Shah, salgnina Shillongona wenbaani somoio, Shillongni a·palogipa Mawiong-o rikgipa Inter-State Bus Terminus (ISBT)-ko New Shillong Township-o tarigipa Cryogenic Plant-ko oprake on·anggen ineba official-rang paraksoaha.
Ma·mong Minister, Sohra (Cherrapunji)-onaba Robibaro songreanggen aro Greater Sohra Water Supply Scheme-ko oprake on·an baksa Ramakrishna Mission Ashram-ona wenanggen.
Home minister, a·dokni civil organisation-rangni dilgiparang baksaba gronge agangrikangnaba donga ineba saksa a·gipi official ka·dongsoaniko parakaha.
Indakeba nikatna man·a je, A·doko Inner Line Permit (ILP)-ko ra·gatchina gita dabienggipa dolrang Shah-ko grongna ka·oksie nisengsoenga.
