SHILLONG: BSF-ni DG IPS Shri Rakesh Asthana, July 24 tariko Meghalaya Frontier-ona wenbae Indo-Bangladesh Border ba sima ario chelchak-naljokaniko nipilangaha. Indake BSF-ni DG, Meghalaya Frontier-ni officer Sh Hardeep Singh, Inspector General baksa agangrikao una Meghalaya-ni security ba chelchak-naljokani obostako u·iate on·aha. Uandake DG, West Jaintia Hills district-ni Border Out Post Dawki-onaba re·ange border ba sima ario donggipa sipairang baksa agangrikaha. Aro uamang baksa agangrikanio sipairangna didiani kattako agana baksana uamangni chu·sokanina de·mittelaha.
Indake ong·engon BSF-ni DG, sal-wal mikka waa ba sal rakan somoioba duty ka·gipa sipairangko de·mittelaha. Aro apsan somoion sima ari gita niamgri drug, matchu-matte badinga aro Narcotics unbaksana Human Trafficking kamrangko champengna rakbate kam ka·china didianiko on·aha. Iarangna agreba sipairangni gisepo an·tangko so·ote siako champengna counselling-ko on·ani bidingoba janapaha. Aro sipairangko social media platform-o kra bewalo jakkalchinaba agan-ku·pattaianiko on·aha. Minggipin DG, Border Oup Post-oni ong·katna skang Plantation Drive ba bol bipang ge·aniko a·bachengate on·aha.
Uandake BSF-ni DG, sima ari jol sepango donggipa songni manderangna mask, sanitizer aro gipin gipin bosturangko suale on·jolaha. Aro songni manderang baksa agangrikaon BSF-oni man·a dipet manderangna chu·gimik dakchakaniko on·na aganaha.
