SHILLONG: Re·baenggipa 2024 bilsiode Salgro Salaram a·dokni skotong songjinma pilakonan rel gari gita aroba sildoreng gita songre songbatani cholko dake on·gnok ine Ma·mongni Home Minister Amit Shah Sonibaro ku·watangaha.
Shillong songjinmani a·palogipa Mawingo rikgipa Inter State Bus Terminus (ISBT)-ko Sonibaro oprake on·miting somoio Shah, iarangko ku·chakangaha.
Unomitingo indake nikatskana man·gen ine, a·dokona gipinchini napdrabaenggipa manderangko champengsoani chol ba niamrangko ra·gatjana kingkingde Shillong songjinmaona rel gariko ra·napbana man·jawa ine Meghalaya adita pressure group-rang krengsoskaenga.
Salgro Salaram a·dokara ge·sa region ong·a, jeon songre songbatani ba re·a doani chlrangko nampdatna gita nangenga, re·a doani cholrangko namdapatachisan a·dokko silroro-namroroatanionaba ra·bagen, Shah aganaha.
Rel gita aroba kosak gita songre songbataniko namdapatan baksa rama sorokrangko tarianioba sorkari gisik nangna nanggen, Home Minister aganaha.
Salgro Salaram a·doko minggittamna an·ching kam ka·na nangenga, an·ching, dakbewal-rikbewalko, cha·a ringaniko aro doka dam·anirangko chel·chak ripingna kam ka·na nanggen, chinga a·dokko tom·tomgipa aro namroro silrorogipa ong·atna nangnikenga, Shah aganaha.
NE-o GDP-ko ong·katatani skangna bate batna nanggen aro 20 percent-ona sokna nanggen, unode an·tangarian a·doko kanga cha·a siani aro golmalrang bon·anggen, ua agandapaha.
Ua agandapa je Shillong ariport-ko a·songni gipin songjinmarang baksaba nangdimatgen.
‘‘Ku·sik aro dakbewalo A·gilsako man·e cha·batsranggipa ianon ong·a indiba iano re·a doanio gipin baksa nangdimani (connectivity) dongjaode uko ru·uta somoirangna simsake donna man·jawa’’ ua aganaha.
A·doko lak 6.5 nokdangrang Jan Dhan Mission-ni ning·o bank account-rangko kuliaha aro da·alo Meghalaya-ba 100 percent ODF free State-rangni gisepo napeaha.
Shillong-ni ISBT-ko DoNER Ministry-ni chamatgipa kror 48.31 tangkarangchi rikaha, jeon mongsonggipa nanganirang jedake soka chakani dring, ki·chak-su·buchakani, restaurant aro dokanrangba dongchapa.
