SHILLONG: Assam-o niam gri matchu badinganiko aro salruraanirangko champengna gita Cattle Preservation Bill-ko ra·gatna siengani gimin ian Meghalaya a·dokna maming nangchakeani dongjawa ine Robibar salo, Assam a·dokni Chief Minister Himanta Biswa Sarma talataniko on·angaha.
Assam a·doko ia Cattle Preservation Bill-ko niam tariahaode a·dokona matchurangko salbana man·jawaha aro matchu be·enrangko man·na neng·gnok ine iani bidingo Assam sorkari baksa agangrikchina gita Meghalaya a·dokni mitam dolrang, Meghalaya sorkariko didiangahachim ine nikna man·a.
Indake ong·engon, Assam-o ia Bill-ko ra·gatanichi Meghalaya a·dokna maming nangchakeani dongjawa aro matchurangko Assam gita salbana permit-rangkosan tarie on·na nangaigen ine Assam-ni Chief Minister talataniko on·angaha.
“Chingni ia bill-ko ra·gatanichi Meghalaya-na ba Nagaland a·dokna ba Arunchal-na matchurangko ra·baanio maming neng·nikani dongjawa. Matchurangko ba je bosturangkoba Assam gita ra·bana man·aigen indiba matchurangko salbana gita permit-rangkosan nangaigen,” ine Robibar salo Sarma, Sohra-o ong·atanggipa program-o bak ra·ani ja·man kobor ra·timgiparangna aganaha.
Assam Chief Minister-ni parakatani gitade, Assam a·dok gita matchurangko salbana a·doktangtangni sorkarirang dingtangmancha permit-ko tarie on·chengna nanggen aro permit dongahaode matchurangko Assam gita salbana man·aigen.
“Ia niamara dingtangmancha Assam a·doknasan ong·aia aro Meghalaya a·dokona ba Nagaland a·dokona Assam gita matchurangko salbana nangenga ong·ode a·doktangni sorkarirang permit-ko on·na nanggen aro permit dongahaode Assam gita je biaponaba matchurangko salangna man·aigen,” ine Sarma aganaha.
Ia Assam Cattle Preservation Bill 2021-ko re·anggipa July 12 tariko Assam-ni Chief Minister Himanta Biswa Sarma, Assam Assembly-ni budget session-ko a·bachengatani salo Assembly-ona ra·angahachim.
