Greater Sohra Water Supply Scheme-chi hajal 20-na baten namgniko man·gen

SHILLONG: Mijal Robibar salni bako Union Home Minister Amit Shah, Greater Sohra Water Supply Scheme-koba a·bachengate on·angjolaha aro ia scheme-ko a·bachengatani somoio ua jinmana aganprakangengon, ia scheme-ko a·bachengatanichi jolo songdongenggipa sak hajal 20-na baten namgnirangko man·gen ine parakangaha.
Meghalaya sorkarini ra·gatgipa Greater Sohra Water Supply Scheme-na DoNER Ministry, NESIDS-ni ning·o gong kror 24.08 tangkarangko 2019 bilsio chame on·ahachim aro ia scheme-ni ning·o komibeoba sak 22,293 manderangna ringani chirangko on·na miksonganio ia scheme-ko sorkari ra·gataha.
Prime Minister Narendra Modi-ni ra·gatgipa Jal Jeevan Mission-ni ning·o Sohra jolo songdongenggipa nokdang ge·antinan ringani chirangko on·na gita ia gong kror 25 ong·gipa Greater Sohra Water Supply Scheme-ko DoNER Ministry aro Meghalaya sorkari, North-East Special Infrastructure Scheme (NESIDS)-ni ning·o a·bachengataha ineba ia scheme-ko a·bachengate on·angani somoio Shah parakataha.
Union Home Minister-ni aganani gitade, Jal Jeevan Mission-ni ning·o Meghalaya a·doko songdongenggipa manderangna, da·o re·baenggipa 2022 bilsio India a·songni chang 75-gipa jakgitelani salko aro Meghalaya a·dokni bilsi 50 gapaniko manina skangan ringani chirangko sokate on·na miksonganio Prime Minister Narendra Modi, ia Mission-ko a·bachengataha.
Jal Jeevan Mission-ko a·bachengatanichi India a·songni manderangna rongtalgipa ringani chirangko on·enga ineba ua a·songni PM Modi-ko mittelpilangaha.
“India a·songni mande sakantian rongtalgipa chiko man·na nangchongmota. An·chingni ringenggipa chirang rongtaljagenchimode an·ching be·enni gita saanirangko man·a. Uni gimin ia Jal Jeevan Mission project, a·songni manderangna rongtalgipa chirangko on·gen,” ine Shah parakataha.
Ia Greater Sohra Water Supply Scheme-ko a·bachengate on·angani somoio Meghalaya a·dokni Chief Minister Conrad K Sangma, DoNER Minister G Kishan Reddy, DoNER-ni Minister of State BL Verma, Science & Technology-ni MoS Jitendra Singh, a·dokni PHE Minister Renikton Lyngdoh aro gipin dilgiparangba dongpae bak ra·angaha.