SHILLONG: Meghalaya a·doko da·o rang·san COVID-19 man·giparang batrorotaiahani gimin ian a·doko gittamgipa changna COVID-ni giproroaniko mesokani chin ong·engaha ine a·dokni Health Minister AL Hek parakataha.
“Ia sal somoirango an·ching COVID man·giparangni batrorobataienganiko nikna man·enga aro ian da·o gittamgipa changna COVID-ni giproroaniko mesokani ong·enga. Uni gimin an·ching pilakan an·tangtangna simsake, niamrangko ja·rikna aro tikarangko ta·raken su·e ra·na nangengaha,” ine Sombar salo Hek parakataha.
Meghalaya a·dokni dam 11 a·jarangon COVID-ni gittamgipa changna giproroaniko warachakna sorkari tarisamsoengaha ine janapatengon, obostarang namjabatrorona skangan sabisini giprorotaianiko warachakna gita sorkari tarisamsoengaha ine Health Minister parakataha.
Hospital-rangosan ong·aigija dingtang dingtang CHC/PHC-rangoba gittamgipa changna COVID-ni giproroaniko warachakna gita kamrangko ka·soengaha ineba Hek parakataha.
Obostarang namjabatroroanggenchimode sorkari lockdown-rangko ra·gattaiani cholrang dongama ine sing·on, lockdown-rangko ra·gatanichi manderang neng·nikanirangko chagrongna nangaha aro bang·a manderangan an·tangtangni kamrangko gimaatna nangaha ine Hek parakataha.
“Beben an·ching sakantinan an·seng baljokaniko nangchongmota indiba apsan somoion an·chingna janggi tangani cholrangkoba nangskaa,” ine Hek aganaha.
Health Minister-ni aganani gitade, manderang sabisi sakanchirangchi aro okkria cha·a sianichiba janggirangko gimaatna man·aia aro iani gimin sorkari niroke ja·kurangko de·na nangenga.
