TURA: Tura-ni District School Education Officer (DSEO) in-charge ong·e kamko ka·enggipa Ela Begum, sorkarini maming order gri kamko jako ra·e ka·enga ine dingtang dingtang dolrangni matnanganiko All Meghalaya Minority Students Union (AMMSU) jegalatskaaha aro ua ia bilsini April 16 tariko a·dokni Governor aro Education department-ni ge·etaniko man·esa da·o kam minggniko (dual charge) jako ra·enga ine parakataha.
Tura-ni DSEO in-charge ong·e kamko ka·enggipa Ela Begum, maming order grisa ia kamko jako ra·enga aro batanggimin somoirangoba uni kosako kacharini gita dingtang dingtang case-rang dongani gimin ua DSEO-ni kamko jako ra·na kragipa ong·ja ine adita salrangna skangsan, Garo Hills-ni dingtang dingtang NGO-rang matnangatenba, ia official-ni biapo saksa mingnamgipa aro kamna kragipa official-ko songe on·skachina sorkariko didiangahachim.
Indake ong·engon, ia NGO-rangni matnanganiko AMMSU jegalatskaenba, ia official, da·o Tura Govt Girls Higher Secondary School-ni principal ong·e Meghalaya a·dokni sorkari high skulrango ja·delbatsranggipa principal-rangoni brigipa ong·enga aro ua Education department-ni order-ko man·ani ja·mansa Tura-ni DSEO in-charge ong·eba kamko jako ra·enga ine parakatskaaha.
“Ela Begum, maming office order gri Tura-ni DSEO in-charge ong·e kamko ka·enga ine matnanganiranga kakket ong·ja maina April 16 tarikon a·dokni Governor aro Education department, Tura Govt Girls Higher Secondary School-ni principal Ela Begum Laskar-na, West Garo Hills a·jao School Education & Literacy-ni Joint Director aro District School Education Officer-ni kamko jako ra·na gita order-ko see on·aha,” ine AMMSU parakataha.
Ia officer-ni kosako baditaba ming kachari case-rang dongkuenga aro uni kosako departmental disciplinary action ra·na nanganirang dongenga ine matnanganina aganchakaniko on·angengon, uni kosako iandakgipa case-rang ba action ra·na nanganirang donggenchimode sorkari, uni service record-onikon nike ma·sina man·genchim indiba uni kosako iandakgipa maming matnanganirang dongjani giminsa sorkari, una ia kamrangko on·aha ine AMMSU parakataha.