TURA: Garo Hills-oba COVID-19 man·e sianggiparang batroroengani gimin COVID man·e sianiko komiatna gita adita salrangna skang West Garo Hills a·jani Deputy Commissioner Ram Singh, dingtangmancha COVID Death Audit Committee baksa tom·e chanchirimangaha.
Ia tom·anio committee-ni membor-rang chanchirimangengon, COVID man·e sianggiparangoni 95 percent-de ja·manchake sanna bananirangko ra·ani a·sel aro 97 percent-de tika su·kugijagiparang ong·achim ine ma·sina man·aha.
Sanna bananirangko ra·na ja·manchake re·batokengani a·sel COVID man·e sianiko komiatna man·jaenga ineba ia tom·anio ma·sina gita man·aha.
Ia tom·anio Deputy Commissioner-ni aganani gitade, COVID-ni chinrang donggenchimoba mitam manderang an·tangtang samrangko ringe dongtokenga aro ja·manchakesa hospital-rangona re·angengani a·sel sanna bananiko on·anio ja·manchakenga.
COVID-ni chinrangko man·on ba porikka ra·anio positive ong·on, ambulance-rangna sengchakgija an·tangtangan sepangbatgipa hospital, PHC ba CHC-rangona re·ange sanna bananirangko ra·na man·ode nambata ineba ia tom·anio Singh aganaha.
COVID man·e sianggipa manderangko gopani bidingo janapatengon, sigimin mandeko gopanio dakchakenggipa manderang, dongimin niamrango pangchake mask-rangko chu·onga gita gangenchimode aro saksa sakgipinoni chel·tanggrike donggenchimode gopramrango PPE-rangko ganna nangjawa ine ia tom·anio medical expert-rang parakataha.
Salbongana bate gusu, sordi ba uandakgipa saanirangko man·genchimode ta·raken sepangbatgipa hospital, PHC ba CHC-rangona re·ange dakchakanirangko ra·china gitaba health official-rang u·iataha. Diltugipa songrango donggipa manderangba, iandakgipa saanirang donggenchimode ASHA ba Anganwadi worker-rangni dakchakanirangko ra·china u·iataha.
