SHILLONG: 1971 bilsio Pakistan a·songni kosako India a·songni cheani bilsi 50 gapaniko manienggipa Swarnim Vijay Varsh-ni bak gita Bristibar salo, Swarnim Vijay Mashaal-ko Meghalaya a·dokni Chief Minister Conrad K Sangma ra·chaksoaha.
Ia Swarnim Vijay Mashaal-ko 2020 bilsini December 16 tariko New Delhi songjinmani National War Memorial-oni watatchengaha aro uandaken ia re·anggipa July 27 tariko Meghalaya a·dokona sokbaenba, ia Mashaal-ko Bristibar salo, a·dokni Chief Minister Conrad Sangma-na Shillong songjinmani Polo Ground-o pakwate on·angaha.
1971 bilsio India aro Pakistan a·songni dakgrikanio India a·songni sipairang an·tangtangko on·kange warachakahani gimin aro ua bilsio Bangladesh a·songni jakgitelaniko man·ahani gimin gisik ra·na gita dingtangmancha program-ko Shillong songjinmani Polo Ground-o ong·atangaha aro ia program-ko ong·atanio Meghalaya a·dokni dilgiparang, dal·dalgipa sipairang, police officer-rang aro gitcham sipairangba dongpae bak ra·angaha.
Ia tom·anio a·dokni Chief Minister jinmana aganprakangengon, a·songtangna an·tangtangko on·kange sianggipa sipairangko mittelpilangenba, a·songna kamko ka·enggipa sipairangko mande ra·skachina a·doko songdongenggipa manderangko didiangaha.
Sipairangni a·songna dangdike on·aniko skie ra·e a·songna dangdike on·china gita ua chadamberangkoba didiangaha.
Ia Swarnim Vijay Mashaal-ko re·baenggipa August 8 tarikona kingking Meghalaya a·doko dongen aro ja·mano Assam a·dokona watatskagen.
