TURA: East Garo Hills a·jao mobile tower-rang aro network-rang namsrangjaenga ine badi ka·anirangko man·sorongengani gimin Sukrobar salo, District Telecom Committee-ni tom·aniko internet gita ong·atangenba, network-rangko nambatatna gita chanchirimangaha.
Ia tom·aniko East Garo Hills a·jani Deputy Commissioner Swapnil Tembe dilangaha aro tom·anio dingtang dingtang telecom, ATC, MeECL aro gipin official-rangba dongpae bak ra·angaha.
East Garo Hills a·jani bang·bata biaprangon network-rangko name man·jaenga ine badi ka·tokengani gimin dingtang dingtang mobile tower-rangko songna aro mongsongbate USOF project-ni ning·o ge 80-na baten Airtel tower-rangko songna man·na gita biaprangko sandichina a·jani block development officer-rangko aro field officer-rangko ge·etanggen ine East Garo Hills a·jani Deputy Commissioner parakataha.
Williamnagar Municipal area-oba internet-rangko chu·onga gita man·jaengani gimin gital tower-rangko songdapna gita mongsonggipa biap damgittamko seokgen ine Deputy Commissioner parakataha aro biaprangko sandianio official-rang baksa bakrimchina jolo songdongenggipa manderangko didiataha.
Kusimkolgre jolo donggipa tower-ko nambate kam ka·na man·na gita bakrodapatgen ine janapatengon, ia kamko chu·sokatna gita Williamnagar Municipal Board-ni CEO, ta·raken dingtang dingtang dolrang baksa kamko ka·anggen ine East Garo Hills a·jani DC parakataha.
Gital tower-rangko songna NOC-rangko nangengani gimin mikkangchi iani bidingo kamrangko ka·angna gita Telecom committee-ni tom·anirangko ong·atjringgen ineba Deputy Commissioner parakataha.
