TURA: West Garo Hills a·jao ma·manti gitcham bosturangko man·anina mingsing minggamako man·gipa Wadagokgre archaeological site-o niam gri ro·ong aro an·chengrangko bikotenga ine kobor on·aha.
Kobor on·timgiparangni u·iatani gitade, niam gri ro·ong bikotgipa manderang, songni nokma baksa sriksrik melie, baditaba salrangna skangan ia jolo donggipa ro·ong aro an·chengrangko bikotna a·bachengaha aro iani bidingo jolo donggipa dingtang dingtang dolrang, jegalanirangkoba daktokengahachim.
Ia Wadagokgre songoniko niam gri ro·ong aro an·chengrangkosan bikote ra·enga ong·ja indiba batanggimin bilsirangonin gipin biaprangoni napdrabae ia jolrango niam gri songdong a·chatokenga ineba dingtang dingtang dolrang badi ka·doangahachim.
Ia Wadagokgre archaeological site-oniko ro·ong aro an·chengrangko niam gri bikotengani gimin ia antio jolo songdongenggipa manderangba official-rango sing·doangtokaha.
Jolo songdongenggipa manderangni badi ka·doangani gitade, songni nokma an·tangan ia songoniko ro·ong aro an·chengrangko bikotna gita permission-ko on·aha aro ua an·tangba ro·ong bikotgiparangoniko tangka paisarangko man·skaaha.
“Batanggimin bilsirangonin gipin biaprangoni manderang ia jolrangona napdrabae chingni a·arangko ra·sekna jotton ka·enga aro da·o chinga chingni a·ao donggipa ma·manti gam-jinrangkoba warachakna nangengaha,” ine Wadagokgre songni manderang parakataha.
Ia songoniko an·cheng aro ro·ongrangko salangna gita changprako gong 150/- ka·e songni nokmana on·enga ineba songni manderang parakataha.
Koborko on·ani gitade, ia songoniko ro·ong aro ma·manti gam-jinrangko bikotna gita dingtang dingtang company-rang, dal·dalgipa gari aro kolrangkoba ra·batokengaha.
Ia biapo ro·ong aro an·chengrangko bikotna gita state forest department-ni permission aro gipin nangchongmotgipa permit-rangko ra·chengmanaha ine songni nokma a·kangengon, indita bilsirangna ripinge rakkienggipa biaponiko maikai a·ningni bosturangko bikotna bilko on·na man·a ine songni manderang sing·doangskaaha.
Iani bidingo songni manderang state forest department-na u·iataha aro Wadagokgre-o niam gri ro·ong aro an·cheng bikotaniko champengatchina gita didiataha.
