TURA: Garo Hills-ni bol wa·arangko gipin biaprangona palsrukatanirang batroroengani gimin iandake bol wa·arangko pale cha·angkugenchimode bilsi 20 ba bilsi 30-ni gisepon Garo Hills, damgipin a·gisi pil·gnok ine A·chik Association for Protection of Environment (AAPE) mikrakataniko on·angaha.
AAPE-ni joint secretary Lawrence A Sangma-ni parakatani gitade, South West Garo Hills a·jani bol wa·arangko gipin biaprangona aro mongsongbate Assam a·dokona salantian palsrukatenga ine badi ka·anirangko man·soani gimin AAPE-ni membor-rang, South West Garo Hills a·jaona re·ange nion, maming nangchongmotgipa lekkarang gri, ia jolrango donggipa bolrangko salantian gipin biaprangona salangenga ine nikna man·aha.
“Ramarango nitimenggipa forest aro police official-rang donggenchimoba maikai ia ramarang gita bolrangko salangna man·enga? Ian bolrangko badingenggipa aro official-rangni gisepo ong·gija dakaniko mesokanisa ong·enga. Mikkangchiba bol wa·arangko iandake bang·gija tangka paisarangna pale cha·angkugenchimode bilsi 20 ba bilsi 30-ni gisepon Garo Hills, damgipin a·gisi pil·chongmotgnok,” ine Sangma parakataha.
A·gilsak gimikon bol wa·arang gimaroroangengahani a·sel ding·anirangba batroroengahani gimin a·gilsakko dingtangatpilani kamde an·tangtangni jakonjok ineba AAPE-ni joint secretary parakataha.
“Uni gimin Garo Hills-o skatang bol den·aniko aro pale cha·aniko an·ching ta·raken dontongna nangchongmotengaha aro niam gri bol badingenggiparangkoba rim·e nanga gita ja·kurangko de·na nangengaha,” ine AAPE parakataha.