TURA: Robibar salo, North Garo Hills a·jaoba mande saksa COVID-19 man·e siangtaiaha aro uandaken North Garo Hills a·jao COVID man·e sianggiparang da·o gimik sak 12 gapengaha ine kobor on·aha.
Sianggipa mandeara North Garo Hills a·jani Babukona songoni bilsi 76 ong·gipa mande ong·achim aro ua Robibar salo Guwahati Medical College Hospital-o siangaha ine kobor on·aha.
Koborko on·ani gitade, Robibar salo gimik sakbonga manderang, North Garo Hills a·jani dingtang dingtang biaprango COVID-19 man·daptaiaha aro uandaken da·o COVID man·e dongenggiparang gimik 86 gapengaha.
Ia apsan salon sak 12 manderangde COVID-oni nampilskana man·aha aro uandaken COVID-oni nampilgiparangba gimik sak 1471 gapskaengaha.
Indake ong·engon, North Garo Hills a·jao bilsi 18 batgimin manderangna August 2 tarikoni August 14 tarikona, dingtang dingtang biaprango COVID-ni tikarangko su·e on·enga ine North Garo Hills a·jani official-rang parakatenba, tika su·kugijagipa manderangko ia biaprangona re·ange tikarangko su·e ra·china gita didiataha.
