TURA: West Garo Hills a·jao aro mongsongbate Tura jillao COVID-19 man·giparang batroroengkuani gimin District Administration, porikka ra·e niani centre damsniko kulidapataha aro ia centre-rangko Sombar sal dipet chalaianggen.
District Surveillance Officer-ni u·iatani gitade, ia porikka ra·e niani centre-rangara Chandmary TMB testing centre, Gorkha LP School, police reserve, Tura Thana area, Legal Metrological Department, Dakopgre-o donggipa DTO office sambao, Matchakolgre LP School, Dobasipara Community Hall, Hawakhana (Old Maruti Garage) aro Nakam Bazar-o donggipa Hindi Govt LP School-o ong·gen.
“Ia damsni centre-rangon RAT aro RT-PCR test-rangko indin tangka paisa gri ka·na man·gen aro ia porikka ra·ani centre-rangko Sombar saloni Sonibar salona pring 10:00 bajioni attam 3 bajiona kuligen,” ine sorkari official talatangenba, manderangko aro mongsongbate chin donggiparangko ia centre-rangona re·ange an·tangtangko porikka ra·e niechina didiataha.
Ia centre-rango positive ong·gipa manderangna Home Isolation Kits (HIK)-rangkoba suale on·angjolgen aro ia HIK-rangko COVID positive ong·gipa mandeni nokdangoni jeba report-ko mesoke ra·ena man·gen ineba u·iataha.