TURA: South Garo Hills a·jao Water supply scheme-na tangka chamaniko ma·sie ra·na gita RTI ka·anina sal 30-ni ja·manoba aganchakaniko on·jahani gimin Baghmara-o donggipa PHE department-ni Public Information Officer (PIO)-ni kosako Garo Students Union (GSU) Mindikgre regional unit-ni president Greneth M Sangma, Shillong-o donggipa State Chief Information Commissioner-na badi ka·doangaha.
GSU president-ni u·iatani gitade, NABARD (RIDE-XXV) 2019-2020-ni water supply scheme project-ni ning·o tangka paisa chamaniko ma·sie ra·na gita ua PHE department-o RTI ka·ahachim. Uni RTI-o ua sorkarini ra·chakgipa Detailed Project Report (DPR), tender notice-ni copy, kamko man·gipa contractor-rangni biming aro project-ni site map-rangni giminba sing·doangahachim.
“RTI baksana anga PIO-ni kosako badi ka·e e-mail gitaba official-rangna sedoatahachim indiba angni RTI-na maming aganchakanirangko on·jaha,” ine Greneth Sangma parakataha.
Indake ong·engon, RTI Act 2005-ni dongimin niamrango pangchake ia official-ni kosako nanga gita ja·kurangko de·china GSU-ni president, State Chief Information Commissioner-na sedoataha.