SHILLONG: Meghalaya Secretariat-o COVID man·daldalgiparang dongtaiahani gimin Budbar sal dipet a·paloni manderangko Secretariat-o napaniko champengataha.
Budbar salo Additional Chief Secretary DP Wahlang-ni u·iataniko on·angani gitade, gital u·iataniko on·taikujaskal a·paloni manderangko Yojana Bhavan aro Additional Building-ko man·chape Secretariat Building-rango napna on·jawaha.
Secretariat-o nitimenggipa sipairangkoba mikrakbate nirok sandichina aro Secretariat-ona re·baenggipa manderangoniko identity card-rangko bi·china gita sorkari official u·iataha.
Batanggimin konta 24-ni gisepon Meghalaya a·doko sak 521 manderang COVID man·daptaiaha aro sak 7 manderang COVID man·e siangtaiahachim.
Sorkari official-rangni u·iatani gitade, COVID man·e sianggiparangara tika su·kugijagiparangsa ong·achim.
Meghalaya a·doko COVID man·giparang aro COVID man·e sianggiparang komijaengani gimin COVID-ni giproroaniko champengna dongimin niamrangko ja·rikchina gita a·dokni Deputy Chief Minister aro Health Minister Prestone Tynsong didiataha.
“A·doko songdongenggipa mande sakantikon an·tangtangna simsakchina aro naljoke dongchina anga mol·molatenga. Nangchongmotana agrede nokoni ong·katjachina aro nokoni ong·katengoba mask-rangko ganchina aro COVID-ni niamrangko ja·rikchina anga didienga. Iasan an·chingna chol dongaiaha,” ine Deputy Chief Minister parakataha.
