SHILLONG: An·tangni constituency ning·o aro mongsongbate East Jaintia Hills a·jao niam gri coke karkanarangko chalaina on·jawa ine a·dokni Social Welfare Minister aro Khliehriat-ni MLA Kyrmen Shylla parakataha.
East Jaintia Hills a·jao niam gri coke karkanarangko chalaiengani a·sel mandena aro samtangtango ong·telaigiparangna namgijaniko ong·atenga ine Mongolbar salo, jolo songdongenggipa manderang jinma jegale re·jomaniko ong·atangahani gimin jolni MLA, ia kattarangko aganaha.
“Niam gri kamrangko ka·engani a·selan a·dokna noksan ong·enga aro manderangba an·tangtangni man·gnirangko gimaatna nangenga,” ine Shylla aganaha.
Karkanarangko chalaina nangchongmotgipa lekkarang baksa samtangtangko chel·chakna dongimin niamrangko ja·rike chalaienggipa karkanarangkode sorkari champengna man·jawa ineba Khliehriat MLA aganaha.
“Ia manderang bang·bea tangka paisarangko invest ka·e kam ka·enga indiba niamko pe·e niam gri kam ka·giparangkode sorkari champengna nangao ga·aka,” ine Shylla aganaha.
MLA-ni parakatani gitade, ia jolrango karkanarangko chalaigipa manderangna songtang noktangni dilgiparangan NOC-rangko on·engachim.